Balati Nguyup Getih

Si kehed teh. Teungteuingan pisan. Inceran uing direbut.
Nandang kekerot. Ti tukangeun tangkal kalapa manehna nyerankeun Ujang keur
diuk pagegeye jeung Kokom. Duanana uplek ngobrol diselang ke seuseurian.
Kokom deui bet murahan. Ka kuring siga enya ngalayanan, tetela ka batur oge
nyongsrong-nyongrongkeun maneh. Geulis mah geulis, tapi ari kalakuan siga
kita mah taya ajenna.
Batin Nandang ngadon noroweco. Ari panon mah tetep nancep ka hareupeun warung,
kana bangkut tempat Asep jeung Kokom ngadon indehoy. Diuk maranehna teh beuki
napel lir aya lemna. Nandang antukna nempo duanana cengkat, patutur-tutur
asup ka warung.
Serrr. Rarasaan Nandang jadi aneh. Manehna inget, kamari Kokom kumanehna terus
dipeped. Najan terus ngalayanan, tapi basa diajak asup ka warung teh manehna
nolak. Tapi, ieu, menehna bet daek ngabarengan asep ka jero.
Gedur, ujug-ujug aya seuneu amarah nu ngalentaban dada Nandang. Dirina asa
geus bebeakan keur ngahelaran Kokom teh. Belaan ladang ngojeg contang
satengahna demi nyenenangkeun randa kembang warung teh. Sagala dibeulian.
Kadahareun nepika pakeeun. Kari-kari ayeuna bet kieu jadina.
Teu sadar Nandang ngarampa cangkeng. Hulu balati kacabak. Kamamana ge da tara
leupas. Bongan ayeuna mah geus kawentar loba rampog nu ngadodoho tukang ojeg.
Sigana balati teh jadi menta getih. Lain rampog, tapi ti si Asep. Sakedapan
manehna rada ngarengkog. Asep teh kapan katelah jago maenpo. Manehna jebolan
perguruan Macan Kumbang, perguruan silat nu kakoncara di kampung Babakan.
Tapi, ah, asal bisa dibongohan piraku teu bisa dibereskeun. Gerentes Nandang.
Kituna teh bari ngeteyep ngadeukeutan warung. Geus sepi warung teh. Maklum
geus liwat tengah peuting. Bi Marni, nu ngajaga warung, tembong kasarean bari
naleukeum kana meja. Sinar patromak mimiti kucap-kiceup, sigana erep minyak.
Nandang nyalingker ka tukangeun warung. Ngeteyep ngadeukeutan jandela. Barang
srog ka handapeun jandela, langsung kadenge sora patempasan obrolan jeung
seuri anu ditahan-tahan.
Nandang neangan liang keur noong. Gampang da bilik warung teh geus kahakan
umur. Breh dijero, Asep jeung Kokom keur diuk pagegeye di sisi ranjang.
Leuenguen asep meulit kana cangkeng Kokok. Ari Kokom anteng nyarande kana
dada Asep. Nandang beuki kaseuneu.
Kapan adegan kitu pisan anu minteng kabayang-bayang kumanehna. Tapi naha
kanyatananya bet Asep nu ngalakonanana.
Di jero geus taya soara. Nandang musatkeun panon. Tetela Asep jeung Kokom keur
silih lamot biwir. Suku Nandang Nyoroncod.
Adegan dijero kamar tembong beuki panas. Leungeun Asep ngotektak, nyulusup
kana jeroeun baju Kokom. Nu diramesan teu nolak, malah humarurung. Sora Kokom
teh siga bensin nu nyeblok napsu Asep. Manhena langsung narik Kokom kana
kasur terus ditindihan. Kalakuan Asep beuki motah.
Nandang teu bisa nahan amarah. Manehna nyabut balati. Peureupna neunggeul
jandela satakerna. Jleng, manehna luncat ka jero kamar. Kokom ngajerit kaget.
Sakilat, balati teh langsung nguyup getih.
Nandang mundur. Panonna siga teu percaya. Balati anu satakerna diarahkeun
kaasep, sacara ajaib bisa dibalikeun kamanehna. Eta balati teh nancep dina
dadana. Getih ngucur maseuhan bajuna.
Kokom ngajert. Asep nangtung na kasur, siap-siap bisa Nandang nyerang deui.(*)